أنا حد مكركب من جوا
ومحتاج ترتيب
و بشوفني بقول إن أنا هو
أو حد غريب
كركبه من غير مقصد " جايز "
درج الإحباط كله جوايز
وعلي الجدران سورة الفرقان
و سريرى عليه نهر لذايذ
الضلمة وصوت حشرجه ومقام
و دبحت الصمت بغنى كلام
طاير جوايا أنا سرب حمام
و السما بتضم كفوفها عليه
سراديب و كهوف
تماثيل و رفوف
كل ده م الخوف
ولا ده معروف معمول فيا
أنا زي ما قالوا الألاتيه
ب أبدأ بالدو
وانتهي بالدو
أنا اول حد يغني نشاز
وأساتذة فن
يقولوا سيبوه
أنا أول عاشق عِشق التوه
وعمله بحور
من عضم الحور بيبني مراكب
أنا راكب
عقلي بقالي زمان
وتعبت نزلت لوحدي مشيت
أنا أول ضحكه اضحكها
بكيت
أنا أول طوبه
في جدار البيت
أنا موت زمان ولا ميت مره
لكن من نظره رجعت صحيت
أنا يخرب بيت
قلبي يا شيخه
جامد من برة و بيقرمش
لكن قدام عينك خيخه
بيتحول مضرب في إيدكي
ويطيح في الكل
ومطرح مايطول يحصد ويجيب
فتحول اوضه بميت سرداب
مليانه لحد السقف كمان
خرده و كراكيب
ليست هناك تعليقات:
إرسال تعليق